Apple 2029-cu ildə iPhone Pro ekranlarını dəyişəcək!
Yeni texnologiyanın ekranın daha nazik olmasına, işıq keçiriciliyinin artırılmasına və enerji sərfiyyatının azalmasına imkan verəcəyi gözlənilir.
Apple-ın 2029-cu ildən satışa çıxarılacaq yüksək səviyyəli iPhone Pro modellərində yeni ekran texnologiyasından istifadə etməyi planlaşdırdığı bildirilir. UBI Research-in hesabatına görə, şirkət ənənəvi OLED ekranlardakı polyarizator təbəqəsini aradan qaldıran CoE (Encapsulation on Color Filter) texnologiyasına keçid üzərində işləyir. Yeni texnologiyanın ekranın daha nazik olmasına, işıq keçiriciliyinin artırılmasına və enerji sərfiyyatının azalmasına imkan verəcəyi gözlənilir. Bu dəyişiklik həmçinin iPhone-un daxilində batareya və kamera kimi komponentlər üçün əlavə yer yarada bilər.
Lakin polyarizatorun çıxarılması ekranın xarici işıqda görünməsi, əks olunmalar və rəng dəqiqliyi ilə bağlı texniki çətinliklər yaradır. Apple-ın bu problemləri həll etmək üçün texnologiyanı 2029-cu ilə qədər inkişaf etdirəcəyi gözlənilir. İlkin mərhələdə Samsung Display və LG Display-in əsas təchizatçılar olacağı, BOE-nin də prosesə qoşula biləcəyi bildirilir.