Fransa kriptovalyutalara yeni vergi tətbiq etməyi planlaşdırır

Fransa parlamentinin Maliyyə Komitəsi 800 min avrodan çox kriptoaktivə sahib olan investorların ölkədən köçərkən reallaşdırılmamış gəlirlərinə vergi tətbiqini nəzərdə tutan təklifi dəstəkləyib. Təklifə əsasən, bəyan edilməmiş şəxsi kriptovalyuta cüzdanlarına görə 10 min avroyadək cərimə də tətbiq oluna bilər.

Dəyişikliklər 2027-ci il yanvarın 1-dən qüvvəyə minmək üçün təklif olunur. Yeni qaydalar Fransanın mövcud “çıxış vergisi” mexanizmini kriptovalyutalara da şamil etməyi nəzərdə tutur. Vergi son 10 ilin ən azı 6 ilini Fransada yaşamış və ölkəni 800 min avrodan çox qiymətli kağızla tərk edən şəxslərə tətbiq olunur.

Təklif qəbul edilərsə, xarici platformalarda və şəxsi cüzdanlarda saxlanılan kriptoaktivlər də bu qaydalara daxil edilə bilər. Bununla belə, kriptovalyutalar üzrə konkret vergi dərəcəsi hələ müəyyən edilməyib.

Komitə, həmçinin ümumi dəyəri ən azı 100 min avro olan şəxsi kriptovalyuta cüzdanlarının bəyan edilməsini nəzərdə tutan təşəbbüsü də dəstəkləyib. Hazırda bəyan öhdəliyi əsasən xarici kriptovalyuta hesablarına aiddir.

Digər təkliflərə stabilkoinlərin kriptovalyuta ilə mübadiləsinin vergiyə cəlb edilməsi, investorların zərərlərini gələcək qazancdan çıxmasına imkan verilməsi və vergi orqanlarının sənəd tələblərinə əməl etməyənlər üçün cərimələrin artırılması daxildir.

Təşəbbüsün tərəfdarları kriptovalyutaların mövcud vergi qaydalarından yayınmaq üçün istifadə edilə biləcəyini bildirirlər. Bununla yanaşı, sektor nümayəndələri şəxsi cüzdanlar barədə məlumatların toplanmasının investorların təhlükəsizliyi üçün risk yarada biləcəyini vurğulayırlar.

Qeyd edək ki, təkliflər hələ qüvvəyə minmiş qanun deyil. Maliyyə Komitəsi hökumətin 2027-ci il büdcəsinin gəlir hissəsini rədd etdiyindən, kriptovalyutalarla bağlı düzəlişlərin parlamentin plenar iclasında yenidən təqdim olunması gözlənilir. Büdcə üzrə səsvermələrdən sonra sənəd Senata göndəriləcək.