Toyota istehsalda robotların sayını 400 minə çatdıracaq!

Yaponiyanın avtomobil nəhəngi Toyota qlobal fabriklərində səmərəliliyi artırmaq məqsədilə 400 min yeni robot yerləşdirməyi planlaşdırır. Nikkei-nin məlumatına görə, şirkət bu texnoloji transformasiya üçün təxminən 7 milyard dollar investisiya ayıracaq.

Mərhələli şəkildə tətbiq ediləcək yeni nəsil robotlar istehsal xətlərindəki köhnəlmiş avadanlıqları əvəz edəcək. Bu sistemlər arasında Toyota tərəfindən hazırlanmış humanoid robot texnologiyalarının da olması gözlənilir. Şirkət robotlardan fiziki iş yükünü azaltmaq, istehsal proseslərini sürətləndirmək və səhvlərin sayını minimuma endirmək üçün istifadə etməyi planlaşdırır.

Humanoid robotlar yalnız montaj işlərini yerinə yetirməyəcək. Onların təcrübəli işçilərin hərəkətlərini müşahidə edərək müxtəlif tapşırıqları öyrənməsi də nəzərdə tutulur. Toplanan məlumatlar gələcək istehsal standartlarının hazırlanmasında və yeni işçilərin uyğunlaşma prosesinin sürətləndirilməsində istifadə ediləcək.

Toyota-nın bu addımı avtomobil sənayesində avtomatlaşdırma prosesinin sürətləndiyini göstərir. BMW və Mercedes-Benz kimi şirkətlər də istehsal müəssisələrində humanoid robotlardan istifadəni genişləndirmək üçün investisiyalar həyata keçirirlər. Toyota isə yeni texnologiyalarla istehsal xərclərini azaltmağı və qlobal rəqabət qabiliyyətini artırmağı hədəfləyir.