Anthropic-in maliyyə nəticələri açıqlanıb
Sənədə əsasən, 30 sentyabrda başa çatan üç ay ərzində Anthropic-in xalis zərəri 23,29 milyard dollar təşkil edib. Halbuki ikinci rübdə bu göstərici 66,3 milyard dollar idi.
Süni intellekt şirkəti Anthropic üçüncü rübdə gəlirlərinin artması fonunda xalis zərərini əhəmiyyətli dərəcədə azaldıb. Şirkətin maliyyə nəticələri ABŞ Qiymətli Kağızlar və Birja Komissiyasına (SEC) təqdim edilən yenilənmiş IPO sənədində açıqlanıb.
Sənədə əsasən, 30 sentyabrda başa çatan üç ay ərzində Anthropic-in xalis zərəri 23,29 milyard dollar təşkil edib. Halbuki ikinci rübdə bu göstərici 66,3 milyard dollar idi. Eyni zamanda, şirkətin gəliri 11,56 milyard dollardan 16,96 milyard dollara yüksəlib.
Anthropic-in maliyyə göstəriciləri şirkətin bazar dəyəri ilə bağlı gözləntilərə də təsir edib. İnvestorlar üçün keçirilən tədbirdə maliyyə məlumatları açıqlanandan sonra bəzi mövcud və potensial investorlar şirkətin qiymətləndirilməsini təxminən 2 trilyon dollardan 1,5 trilyon dollara endiriblər. Gözlənilən IPO isə investorların süni intellekt sektoruna marağının mühüm sınağı hesab olunur.
Şirkətin diqqət çəkən göstəricilərindən biri də gələcək xərclərlə bağlı öhdəlikləridir. Anthropic Amazon və Alphabet-in Google şirkəti də daxil olmaqla texnologiya tərəfdaşları ilə müqavilələr çərçivəsində təxminən 895,4 milyard dollar xərcləməyi öhdəsinə götürüb. Bu məbləğ süni intellekt infrastrukturu üzrə ən böyük investisiya öhdəliklərindən biri hesab olunur.
Bununla yanaşı, Anthropic üçüncü rübdə 567 milyon dollar əməliyyat zərəri açıqlayıb. Halbuki əvvəlki rübdə şirkət 974 milyon dollar əməliyyat mənfəəti əldə etmişdi. Xəbərin açıqlanmasından sonra Amazon səhmləri 4%, Alphabet səhmləri isə 2,1% bahalaşıb.