Bitcoin texnologiya səhmləri fonunda ucuzlaşdı

Bitcoin qlobal texnologiya səhmlərindəki kəskin satışlar və investorların riskli aktivlərə marağının azalması fonunda ucuzlaşıb. Dünyanın ən böyük kriptovalyutasının qiyməti 0,4% azalaraq 83.673,1 dollara düşüb. Bitcoin əvvəlki gün 81.054,7 dollar səviyyəsinədək geriləyib.

Kriptovalyuta bazarında eniş üçüncü rübdəki güclü artımdan sonra investorların mənfəətlərini reallaşdırması ilə də əlaqələndirilir. Oktyabr ayının tarixən Bitcoin üçün güclü dövr hesab edilməsinə baxmayaraq, yeni tənzimləyici qərarların və böyük həcmli alışların olmaması qiymətlərə təzyiq göstərib.

Süni intellekt və texnologiya şirkətlərinin səhmlərindəki satışlar da investorların risk iştahasını azaldıb. Süni intellekt sektorunun gəlirliliyi ilə bağlı şübhələr və Çinin çip istehsalında irəliləyişləri bu sahədə narahatlığı artırıb. Nəticədə investorlar Bitcoin və digər riskli aktivlərə daha ehtiyatlı yanaşmağa başlayıblar. Bunun əksinə olaraq, qızıl və Yaponiya yeni kimi ənənəvi təhlükəsiz aktivlərə maraq artıb.

Digər tərəfdən, 2019-cu ildən bəri fəaliyyətsiz olan bir Bitcoin cüzdanı yenidən aktivləşib. Təxminən 378 milyon dollar dəyərində 5.582 Bitcoin beş fərqli ünvana köçürülüb. Böyük həcmli kriptovalyuta köçürmələri bəzən satış ehtimalı ilə əlaqələndirilsə də, bu əməliyyatın satış məqsədi daşıdığı təsdiqlənməyib.

Bitcoin-in ucuzlaşması digər kriptovalyutalara da təsir edib. Ether 1,4% azalaraq 2.534,41 dollara, XRP 2,7%, Cardano 5,3%, Solana 3,6%, BNB isə 1,3% ucuzlaşıb.