İndoneziya birjası kəskin enişdən sonra yüksəlib

İndoneziyanın Cakarta Kompozit İndeksi son 2 gündəki təxminən 15%-lik enişdən sonra 5%-ə qədər yüksəlib. Buna baxmayaraq, ölkənin fond bazarı qlobal miqyasda ən zəif göstəricilərdən birinə sahib olaraq qalır. İlkin eniş 1989-cu ildən bəri qeydə alınan ən kəskin eniş kimi qiymətləndirilir.

İndoneziya Fond Birjası MSCI nümayəndələri ilə görüşdən sonra mülkiyyət strukturu həddindən artıq cəmləşmiş şirkətləri etalon indeksin hesablanmasından çıxaracağını açıqlayıb. Konkret şirkətlərin adları açıqlanmayıb.

Birjanın baş direktoru Ceffri Hendrikin sözlərinə görə, həmin səhmlər Cakarta Kompozit İndeksinin (JCI) ümumi çəkisinin təxminən 18%-ni təşkil edir. Onların indeksdən çıxarılması üçün vaxt cədvəlinin yaxın zamanda açıqlanacağı bildirilib. Bu səhmlərlə ticarət davam edəcək, lakin onların qiymət dəyişiklikləri indeksə təsir göstərməyəcək.

İndoneziyada şirkətlərin mülkiyyət strukturlarının şəffaf olmaması və sərbəst dövriyyədə olan səhmlərlə bağlı tələblərin zəifliyi uzun müddətdir investorları narahat edir. Bir çox iri şirkətə nəzarət edən səhmdarların üstünlük təşkil etməsi bazarda likvidliyi məhdudlaşdırır və kəskin qiymət dəyişiklikləri riskini artırır.

MSCI cümə günü İndoneziyanın bazar statusunun “inkişaf etməkdə olan bazar”dan “müstəqil bazar”a endirilməsini nəzərdən keçirdiyini açıqlayıb. Yanvarda isə bazarın “sərhəd bazarı” statusuna keçirilməsi ehtimalı ilə bağlı xəbərdarlıq edilmişdi. Reytinq aşağı salınarsa, İndoneziya Livan, Fələstin və Argentina kimi bazarlarla eyni kateqoriyada təsnif edilə bilər.