Süni intellektin gələcəyi ilə bağlı narahatlıqlar artır!

Süni intellekt texnologiyalarının sürətli inkişafı sektorda çalışan mütəxəssislər arasında ciddi narahatlıqlara səbəb olub. Anthropic-in keçmiş əməkdaşı Jacob Coxon şirkətdən istefa verdiyini açıqlayaraq, süni intellekt şirkətlərinin özünü təkmilləşdirə bilən superzəka yaratmaq üçün nəzarətsiz yarışa girdiyini bildirib.

Coxonun sözlərinə görə, süni intellekt sistemləri yaxın illərdə böyük güc və resurslara çıxış əldə edə və müxtəlif sahələrdə ciddi dəyişikliklər yarada bilər. O, həmçinin şirkətlərin bu risklərə kifayət qədər məsuliyyətlə yanaşmadığını iddia edib.

Anthropic əməkdaşı Samuel Marks da süni intellektin bəşəriyyət üçün ciddi təhlükələr yarada biləcəyini bildirib. Onun fikrincə, kommersiya maraqları və şirkətlər arasındakı rəqabət təhlükəsizliklə bağlı narahatlıqlara baxmayaraq, texnologiyanın inkişaf tempinin yüksək qalmasına səbəb olur.

OpenAI-ın baş elmi işçisi Jakub Pachocki isə süni intellektin inkişaf sürətindən narahat olduğunu bildirərək daha geniş təhlükəsizlik tədbirlərinin görülməsinə çağırıb. Mövzu ilə bağlı Alex Turner , Jason Wolfe və Jonathan Richard Schwarz kimi digər mütəxəssislər də süni intellektin mümkün riskləri barədə xəbərdarlıqlar ediblər. Onların fikrincə, artan süni intellekt imkanları qarşısında təhlükəsizliyin təmin olunması üçün daha geniş əməkdaşlıq və koordinasiya tələb olunur.