Altı senator Trampı Rusiyadan dizel alınması planından əl çəkməyə çağırır

Dörd Respublikaçı və iki Demokrat senatordan ibarət ikipartiyalı qrup bazar günü Tramp administrasiyasını Rusiyadan dizel yanacağı almaq planı ilə bağlı “dərhal kursunu dəyişməyə” çağırıb.

Tramp cümə günü Rusiya Prezidenti Vladimir Putinlə telefon danışığında razılığa gəldiyini açıqlamışdı. Onun sözlərinə görə, Rusiya ABŞ və qlobal bazara əvvəlcə 300 min ton, noyabrda əlavə 500 min ton, sonra isə 1 milyon ton dizel yanacağı tədarük edəcək. Daha sonra “qısa müddət ərzində” 3 milyon ton da göndərilməsi nəzərdə tutulub.

Bəyanatı Respublikaçı senatorlar Syuzan Kollins, Liza Murkovski, Tom Tillis və Con Körtis, Demokratlardan isə Cin Şahin və Riçard Blumental imzalayıb. Onlar administrasiyanın qanunla tələb olunduğu kimi Konqresə məsləhətləşmədiyini və qərarını əsaslandırmadığını bildirib. Senatorlar yazıb: “Rusiya Ukrayna vətəndaşlarını öldürməyə davam edərkən, ABŞ Putinə maliyyə yardımı göstərməməlidir.”

Qanunvericilər qeyd edib ki, Konqres 2022-ci ildə Rusiya enerji idxalını qadağan edib, bir neçə həftə əvvəl isə Rusiya neftinin və qazının əsas alıcılarına tarif tətbiqini nəzərdə tutan qanun qəbul edib. Onların fikrincə, Trampın qərarı bu qanuna birbaşa ziddir.

NBC-nin “Meet the Press” verilişində Tillis bildirib ki, plan həyata keçirilərsə, prezidentin qanuna əməl etmədiyini iddia etmək üçün hüquqi əsas var.

Vayomin senatoru Con Barrasso isə CBS-ə müsahibəsində Trampın enerji xərclərini azaltmağa çalışdığını, “tarazlıq saxlayaraq çətin qərarlar” verməli olduğunu deyib. Eyni zamanda o, Trampı Konqresin ötən ay qəbul etdiyi sanksiya qanununu tətbiq etməyə çağırıb.

Tramp ABŞ-da rekord həddə çatan dizel qiymətlərinə görə İran müharibəsini deyil, Ukraynanı günahlandırmağa çalışıb.