Bank of America çirkli pulların yuyulmasına qarşı mübarizədəki nöqsanlara görə 1,2 milyard dollar cərimələnib

ABŞ-ın ikinci ən böyük bankı olan Bank of America çirkli pulların yuyulmasına qarşı mübarizə və şübhəli maliyyə əməliyyatlarının hesabatlandırılması sahəsindəki ciddi nöqsanlara görə 1,2 milyard dollar cərimə ilə üzləşib. ABŞ Maliyyə Nazirliyinin açıqlamasına görə, bank 5 milyard dollardan çox şübhəli əməliyyat barədə müvafiq məlumat təqdim etməyib.

ABŞ Maliyyə Nazirliyinin Maliyyə Cinayətləri ilə Mübarizə Şəbəkəsi (FinCEN) bankın çirkli pulların yuyulması və milli təhlükəsizliklə bağlı riskləri vaxtında müəyyənləşdirmək və hesabatlandırmaq öhdəliklərini yerinə yetirmədiyini bildirib. Araşdırma zamanı müəyyən edilib ki, hesabatlandırılmayan əməliyyatların 1 milyard dollardan çoxu milli təhlükəsizlik və digər yüksək prioritetli maliyyə cinayətləri riskləri ilə əlaqəli olub.

Cərimənin 750 milyon dollarlıq hissəsi ABŞ Valyuta Nəzarəti İdarəsi (OCC) tərəfindən tətbiq edilib. ABŞ Maliyyə Nazirliyi bu məbləği federal bank tənzimləyicisi tərəfindən tətbiq edilən ən böyük cərimələrdən biri kimi təqdim edib.

Maliyyə naziri Skott Bessent bildirib ki, böyük maliyyə qurumlarının nəzarət sistemlərindəki nöqsanlar yalnız bankın özünü deyil, bütövlükdə ABŞ maliyyə sistemini qanunsuz maliyyələşdirmə riskləri qarşısında qoya bilər.

Bununla yanaşı, Bank of America ABŞ Maliyyə Nazirliyinin Xarici Aktivlərə Nəzarət İdarəsi (OFAC) ilə 11,6 milyon dollarlıq razılaşma əldə edib. Razılaşma İran və Rusiya ilə bağlı məhdudiyyətlər, narkotik vasitələrin qaçaqmalçılığı və beynəlxalq terrorizmlə əlaqəli sanksiya proqramlarının mümkün pozuntularına dair iddiaları əhatə edir.

Bank of America bəyan edib ki, maliyyə cinayətləri ilə mübarizə onun əsas prioritetlərindən biridir. Bank tənzimləyici qurumlarla əməkdaşlıq etdiyini, maliyyə cinayətlərinin qarşısının alınması üçün texnologiyaya milyardlarla dollar sərmayə yatırdığını və müəyyən edilmiş nöqsanların aradan qaldırılması istiqamətində işlərini davam etdirdiyini bildirib.

Hadisə ABŞ-da çirkli pulların yuyulmasına qarşı mübarizə çərçivəsində tətbiq edilən iri maliyyə sanksiyaları fonunda baş verib. 2023-cü ildə kriptovalyuta birjası Binance ABŞ hakimiyyəti ilə təxminən 4,3 milyard dollarlıq razılaşma əldə edib. Kanadanın TD Bank bankı isə 2024-cü ildə ABŞ-da çirkli pulların yuyulmasına qarşı mübarizə tələblərinin pozulması ilə əlaqədar təxminən 3 milyard dollarlıq razılaşmaya gedib.

Binance-ın təsisçisi Çanpenq Zhao platformada çirkli pulların yuyulmasının qarşısını almaq üçün tələb olunan tədbirlərin görülməməsi ilə bağlı təqsirini etiraf edib. ABŞ Prezidenti Donald Tramp isə 2025-ci ilin oktyabrında Zhaonu əfv edib.

Bank of America ilə bağlı qərar iri maliyyə qurumlarının şübhəli əməliyyatların aşkarlanması, hesabatlandırılması və beynəlxalq sanksiyalara əməl edilməsi üzrə öhdəliklərinin ABŞ tənzimləyiciləri tərəfindən ciddi nəzarətdə saxlanıldığını bir daha göstərir .