“BP” "Castrol”u 6 milyard dollara satdı: Payın 65%-i ABŞ şirkətinə keçdi

Britaniyanın enerji şirkəti “BP” Castrol sürtkü yağları biznesindəki 65 faizlik payını ABŞ-ın özəl kapital investisiya şirkəti Stonepeak-ə 6 milyard dollara satıb. Əldə olunan vəsait şirkətin maliyyə vəziyyətinin yaxşılaşdırılmasına və borc yükünün azaldılmasına yönəldiləcək.

“BP”şirkətinin açıqlamasına görə, Castrol-dakı nəzarət payının satışından əldə edilən 6 milyard dollar vergi sonrası xalis gəlir şirkətin balans hesabatını gücləndirmək və maliyyə öhdəliklərini azaltmaq üçün istifadə olunacaq.

Razılaşmaya əsasən “BP”Castrol-dakı 35 faizlik payını özündə saxlayacaq. Satışa digər ölkələrdəki bəzi azlıq payları da daxildir. Bunlara Castrol-un Hindistandakı 49 faizlik, Vyetnamdakı 35 faizlik, Səudiyyə Ərəbistanındakı 50 faizlik və Taylanddakı 40 faizlik iştirak payları daxildir.

Razılaşmanın şərtlərinə əsasən, Castrol gələcəkdə öz idarəetmə strukturu və strateji prioritetləri olan müstəqil şirkət kimi fəaliyyət göstərəcək.

Bununla yanaşı, “BP”satış məhdudiyyəti ilə bağlı ikiillik müddət başa çatdıqdan sonra Castrol-dakı qalan 35 faizlik payını da satmaq hüququna malik olacaq.

“BP”-nin baş direktoru Meq O'Nil bildirib ki, şirkət daha sadə, daha güclü və daha dəyərli biznes modelinin formalaşdırılması istiqamətində addımlar atır.

Onun sözlərinə görə, Castrol-dakı nəzarət payının satılması “BP”-yə əhəmiyyətli həcmdə pul vəsaiti daxilolması təmin etməklə yanaşı, şirkətə Castrol-un gələcək inkişafında iştirakını davam etdirmək imkanı verir.

Bu satış “BP”-nin maliyyə vəziyyətini yaxşılaşdırmaq, borc yükünü azaltmaq və biznes portfelini yenidən strukturlaşdırmaq strategiyasının mühüm hissəsidir.

“BP” Castrol üzərindəki nəzarətini Stonepeak-ə ötürsə də, şirkətdəki 35 faizlik payı vasitəsilə brendin gələcək inkişafından faydalanmaq imkanını qoruyub saxlayır.