Çində avtomobil satışları kəskin azalıb!
Ölkədə avtomobil satışları illik müqayisədə 24% azalaraq 1,54 milyon ədədə düşüb.
Çinin avtomobil bazarı avqust ayında kəskin daralıb. Ölkədə avtomobil satışları illik müqayisədə 24% azalaraq 1,54 milyon ədədə düşüb. Davam edən daşınmaz əmlak böhranı və istehlak xərclərinə təzyiq daxili bazarda satışların ilin əvvəlindən 20%-dən çox azalmasına səbəb olub. Daxili tələbin zəifləməsi avtomobil istehsalçılarını xarici bazarlara yönəldib. Çin istehsalçılarının avtomobil ixracı avqustda 78% artaraq 888 min ədədə çatıb. Xarici bazarlara göndərilən avtomobillərin ümumi satışlardakı payı 20%-dən 38%-ə yüksəlib.
Böyük şirkətlər xarici bazarlarda böyümə strategiyasını gücləndirirlər. BYD bu il üçün xarici satış hədəfini 1,5 milyondan 2 milyon avtomobilə yüksəldib. Şirkət avqust ayında 184 mindən çox ixracla Çinin ən böyük NEV ixracatçısı olub. Eyni zamanda, Tesla Şanxaydakı zavodundan təxminən 36 min avtomobili xarici bazarlara göndərib. Daxili bazardakı qiymət müharibəsi isə sektorun maliyyə vəziyyətini zəiflədir. İlin ilk yeddi ayında avtomobil sənayesinin mənfəət marjası 3,6%-ə düşüb. Bu göstərici Çin istehsal sənayesinin orta mənfəət marjası olan 6,5%-dən xeyli aşağıdır və şirkətlərin maliyyə təzyiqinin artdığını göstərir.