Danimarka supermarketlərində humanoid robotlar sınaqdan keçirilir

Danimarkanın ən böyük pərakəndə satış şirkətlərindən biri olan Salling Group supermarketlərdə gecə növbələrində işləmək üçün humanoid robotları sınaqdan keçirir. Layihənin məqsədi rəflərin doldurulması kimi gündəlik işləri avtomatlaşdırmaq və əməkdaşların iş yükünü azaltmaqdır.

Capitalistaz.com xəbər verir ki, sınaqlar Kopenhagen yaxınlığındakı Lyngby şəhərində, Føtex supermarketlərindən birində aparılır. Danimarkanın Hive Robots startapı Çin şirkəti Unitree tərəfindən istehsal olunan robotları öyrədir.

Hazırda robotlar məhsulları rəflərə yerləşdirmək üçün insan operatorlarının köməyindən istifadə edir və supermarket əməkdaşlarından daha yavaş işləyirlər. Startap süni intellekt sahəsindəki inkişafların onların sürətini və dəqiqliyini artıracağını gözləyir.

Şirkətin planına görə, 2027-ci ilin əvvəlinə qədər robotlar müəyyən məhsulları rəflərə müstəqil yerləşdirə biləcəklər. Gələcəkdə onların boş qutuları toplamaq, çatışmayan məhsulları müəyyənləşdirmək və son istifadə tarixlərini yoxlamaq kimi tapşırıqları da yerinə yetirməsi nəzərdə tutulur.

Føtex-in məlumatına görə, əməkdaşlar iş vaxtlarının 40–50 faizini rəflərin doldurulmasına sərf edirlər. Şirkət robotların işçiləri əvəz etməkdən çox, onların yükünü azaltmasına və müştərilərə xidmətə daha çox vaxt ayırmasına kömək edəcəyini bildirir.

Føtex-in əməliyyat direktoru Simon Kudsk gələcəkdə hər mağazada bir və ya iki humanoid robotun istifadəsini hədəflədiklərini bildirib. Robotların bütün mağazalarda tətbiqinin isə bir neçə il çəkə biləcəyi gözlənilir.