MAQATE: Şimali Koreya Yonbyondakı uran zənginləşdirmə qurğusunu genişləndirir
Agentliyin rəhbəri Rafael Qrossi bunu Pxenyanın nüvə arsenalını gücləndirmək niyyətinin daha bir əlaməti adlandırıb. Bu, Donald Trampın Kim Çen Inla görüşmək istəyini bildirdiyi vaxta təsadüf edir.

Agentliyin rəhbəri Rafael Qrossi bunu Pxenyanın nüvə arsenalını gücləndirmək niyyətinin daha bir əlaməti adlandırıb. Bu, Donald Trampın Kim Çen Inla görüşmək istəyini bildirdiyi vaxta təsadüf edir.
BMT-nin Beynəlxalq Atom Enerjisi Agentliyinin (MAQATE) baş direktoru Rafael Qrossi Şimali Koreyanın əsas nüvə kompleksi Yonbyondakı ilkin uran zənginləşdirmə qurğusunu genişləndirdiyini açıqlayıb. Qrossinin sözlərinə görə, bu addım Pxenyanın nüvə silahı proqramını gücləndirmək vədini yerinə yetirdiyini göstərir.
Qrossi MAQATE-nin idarə heyətinə çıxışında bildirib ki, qurğunun yeni genişləndirilməsi 2026-cı ilin sentyabr ayının ortalarından davam edir və oktyabrın sonuna qədər başa çatacaq. O, Şimali Koreyanın uran zənginləşdirmə proqramının genişlənməsini “ciddi narahatlıq doğuran” hal adlandırıb.
Müfəttişlər 2009-dan bəri ölkədə deyil
MAQATE müfəttişləri 2009-cuildə Şimali Koreyadan çıxarıldığından bəri Yonbyona və ölkənin digər obyektlərinə daxil ola bilmir. Agentlik inkişafları peyk görüntüləri və açıq mənbələrdən əldə olunan məlumatlar vasitəsilə izləyir.
Şimali Koreya Yonbyon kompleksini nüvə proqramının “ürəyi” adlandırır. Nüvə silahı həm yüksək dərəcədə zənginləşdirilmiş urandan, həm də silah dərəcəli plutoniumdan hazırlana bilər, Pxenyanın isə hər ikisini Yonbyonda istehsal etmək imkanı var.
Zənginləşdirmə qurğularının sayı artır
Müşahidəçilərin fikrincə, Kim Çen In ilə Tramp arasında 2019-cu ildəki yüksək səviyyəli nüvə diplomatiyası pozulduqdan sonra Şimali Koreya Yonbyonda və başqa yerlərdə əlavə zənginləşdirmə qurğuları tikib. Cənubi Koreyanın Birləşmə naziri Çunq Donq-yonq ötən il Şimali Koreyanın dörd uran zənginləşdirmə müəssisəsi işlətdiyini və onların fasiləsiz fəaliyyət göstərdiyini bildirmişdi.
Tramp görüş istəyini bildirib
Qrossinin açıqlaması ABŞ prezidenti Donald Trampın Çində keçiriləcək sammitdə iştirak üçün Asiyaya səfəri zamanı Kim Çen Inla görüşmək marağını ifadə etdiyi vaxta təsadüf edir. ABŞ dövlət katibi Marko Rubio isə sonradan Trampın Çinə səfəri çərçivəsində hələlik görüş planlaşdırılmadığını, lakin prezidentin Pxenyanla yeni dialoqa hazır olduğunu deyib. Şimali Koreya Trampın son açıqlamalarına cavab verməyib.
Kim əvvəllər ABŞ ölkəyə qarşı “düşmən siyasətindən” əl çəkərsə və Şimali Koreyanın nüvə dövləti statusunu qəbul edərsə, danışıqlara qayıda biləcəyini bildirmişdi. Ekspertlər hesab edir ki, Pxenyan beynəlxalq səviyyədə nüvə dövləti kimi tanınmaqla BMT-nin iqtisadi sanksiyalarının ləğvini tələb etməyə çalışır.