Şimali Koreya süni intellekt imkanlarına malik raket sınaqdan keçirib

Şimali Koreya orta mənzilli strateji ballistik raketi sınaqdan keçirib. Pxenyan raketin uçuş zamanı trayektoriyasını dəyişə və süni intellekt imkanlarından istifadə edərək raketdən müdafiə sistemlərindən yayınmağa qadir olduğunu açıqlayıb.

“Reuters”in məlumatına görə, raket ölkənin şərqindəki Vonsan sahil bölgəsindən buraxılıb və təxminən 680–700 kilometr məsafə qət edib.

Şimali Koreya lideri Kim Çen Inın bacısı Kim Yo-jong raketin sınağına liderin şəxsən nəzarət etdiyini bildirib. Onun sözlərinə görə, raketin aşağı hündürlükdə manevr etmək və uçuş trayektoriyasını dəyişmək imkanları onun Cənubi Koreya və Yaponiyanın raketdən müdafiə sistemləri tərəfindən ələ keçirilməsini çətinləşdirir.

Kim Yo-jong raketi “strateji” adlandırıb. Bu ifadə onun nüvə başlığı daşımaq potensialına malik ola biləcəyinə işarə kimi qiymətləndirilir.

Cənubi Koreya və Yaponiya raketin uçuş məsafəsi ilə bağlı fərqli göstəricilər açıqlayıb. Seul raketin 700 kilometrdən çox, Tokio isə təxminən 680 kilometr məsafə qət etdiyini bildirib.

Sınaq Koreya yarımadasında gərginliyin artdığı bir vaxta təsadüf edib. Sentyabrın 21-də sərhəd yaxınlığında mina partlayışları nəticəsində üç Cənubi Koreya əsgəri yaralanıb. Seul minaların Şimali Koreya tərəfindən yerləşdirildiyini açıqlasa da, Pxenyan bu ittihamları rədd edib.

Şimali Koreya son həftələrdə raket sınaqları və hərbi təlimləri intensivləşdirib. ABŞ Sakit Okean Komandanlığı son buraxılışın ABŞ və müttəfiqləri üçün dərhal təhlükə yaratmadığını bildirib.

Pxenyan 2019-cu ildə ABŞ ilə nüvə danışıqlarının nəticəsiz başa çatmasından sonra nüvə və raket proqramlarını genişləndirib, eyni zamanda Rusiya ilə hərbi əməkdaşlığını gücləndirib.