Neft bazarında yüksəliş davam edir!

Yaxın Şərqdə artan gərginlik qlobal neft tədarükünün təhlükə altına düşəcəyi ilə bağlı narahatlıqları artırıb. Bu səbəbdən neft qiymətləri ardıcıl dördüncü sessiyada yüksəlib. İlkin ticarətdə Brent neftinin qiyməti 1,4% artaraq bir barel üçün 99,33 dollar , ABŞ WTI neftinin qiyməti isə 1,4% yüksələrək 94,34 dollar olub. Beləliklə, Brent nefti 100 dollar səviyyəsinə yaxınlaşıb.

Qiymət artımının əsas səbəbi bölgədə münaqişənin yenidən şiddətlənməsi və enerji infrastrukturuna hücumların artmasıdır. Mühüm gəmiçilik marşrutlarının da risk altında qalması qlobal neft tədarükü ilə bağlı narahatlıqları artırır. Analitiklər hesab edirlər ki, münaqişənin uzun müddət davam etməsi bazarda riskləri daha da yüksəldə bilər. Xüsusilə Səudiyyə Ərəbistanının enerji obyektlərinə və ixrac marşrutlarına mümkün hücumlar diqqətlə izlənilir. Bazar iştirakçıları bölgədəki son hadisələri yaxından izləyir. Gərginliyin daha da artması halında neft qiymətlərinin 100 dolları keçməsi və enerji bazarında əlavə dalğalanmaların yaranması ehtimalı yüksələ bilər.