Neft qiymətləri yenidən ucuzlaşıb!

Neft qiymətləri əvvəlki sessiyada 4% bahalaşdıqdan sonra cümə axşamı günü yenidən ucuzlaşıb. Bazarda əsas diqqət İran və ABŞ arasında müharibənin dayandırılması ilə bağlı diplomatik danışıqlara və enerji tədarükünün gələcək vəziyyətinə yönəlib. Brent markalı neftin fyuçersləri 0,9% azalaraq 1 barel üçün 102,13 dollara düşüb. ABŞ-ın Qərbi Texas nefti (WTI) isə 0,7% ucuzlaşaraq 91,56 dollar olub.

İran rəsmiləri ABŞ ilə müharibənin başa çatdırılması üçün diplomatiyaya açıq olduqlarını bildiriblər. Bununla belə, iki ölkə münaqişənin necə dayandırılacağı ilə bağlı hələ də razılığa gələ bilməyib. Tehran ABŞ-ın dəniz blokadasının aradan qaldırılmasını və Hörmüz boğazının yenidən açılmasını əsas şərtlər sırasında göstərir.

Digər tərəfdən, ABŞ-da dizel ixracına mümkün məhdudiyyətlərlə bağlı xəbərlər də neft bazarına təsir edib. Ağ Ev 90 günlük dizel ixracı qadağası barədə xəbərləri təkzib edib. ABŞ-ın xam neft ehtiyatları isə ötən həftə 3 milyon barel artaraq 426,4 milyon barelə çatıb.