Neftin qiyməti 100 dollardan aşağı düşdü!
Son dörd gündə Brent neftinin qiyməti təxminən 8% azalıb.
Neft qiymətləri son dörd gündəki enişdən sonra bu gün də ucuzlaşıb. Brent markalı neftin qiyməti 100 dollardan aşağı düşərək təxminən 99 dollar olub. Qiymətlərdəki enişin əsas səbəblərindən biri ABŞ və İran arasında mümkün danışıqlarla bağlı gözləntilərdir. İnvestorlar bu həftə BMT Baş Assambleyası çərçivəsində iki ölkə arasında diplomatik təmaslarla bağlı xəbərləri izləyirlər.
Son dörd gündə Brent neftinin qiyməti təxminən 8% azalıb. Analitiklər hesab edirlər ki, ABŞ və İran arasında danışıqlarda irəliləyiş olarsa, regiondakı risklər azala və bu, neft qiymətlərinə təsir göstərə bilər.
Bununla yanaşı, Yaxın Şərqdə gərginlik davam edir. İran tərəfindən dəstəklənən Yəməndəki Husilər Səudiyyə Ərəbistanındakı neft obyektlərinə hücumlar həyata keçirdiklərini açıqlayıblar. Digər tərəfdən, Səudiyyə Ərəbistanının Çin vasitəsilə İrana müraciət edərək Husilərin hücumlarını məhdudlaşdırmağa kömək istədiyi bildirilir. Hazırda neft bazarında vəziyyət ABŞ–İran diplomatik danışıqları və Yaxın Şərqdəki hadisələrdən asılı olaraq dəyişir. Analitiklər hesab edirlər ki, bölgədə aydın diplomatik irəliləyiş və ya yeni gərginlik yaranana qədər neft qiymətlərində dalğalanmalar davam edə bilər.