Almaniya ilə Çin arasında ticarət fərqi böyüyür

Almaniyanın Çinlə ticarətində idxal və ixrac arasındakı fərq böyüyür. Alman İqtisadiyyat İnstitutunun (IW) hesabatına görə, ölkə 2026-cı ilin ilk yarısında Çindən bu ölkəyə satdığı malların dəyərindən təxminən 2,5 dəfə çox mal alıb. Bu tendensiya davam edərsə, illik ticarət kəsiri 100 milyard avronu keçə bilər.

Ən ciddi dəyişikliklərdən biri avtomobil sektorunda yaşanır. Almaniyanın Çinə avtomobil ixracı 2019-cu illə müqayisədə 50% azalıb. Eyni dövrdə Çindən avtomobil və ehtiyat hissələrinin idxalı isə 475%-dən çox artıb.

Maşınqayırma və elektrik sənayesində də vəziyyət pisləşir. Maşınqayırma sahəsində Almaniya 2019-cu ildə Çinə satdığı məhsullardan idxala xərclədiyindən 10 milyard avro çox gəlir əldə etmişdi. Bu il isə əksinə, idxalın ixracı 1 milyard avro üstələyəcəyi gözlənilir.

Hesabatda qeyd olunur ki, problemin əsas səbəbini yalnız yüksək enerji xərcləri ilə izah etmək olmaz. Kimya, kağız, şüşə və metal kimi çox enerji tələb edən sahələrin ümumi ticarət kəsirindəki payı cəmi 4 milyard avrodur. Çinlə rəqabətin təsiri Almaniya sənayesinin əsas istehsal sahələrində daha güclü hiss olunur.

IW mütəxəssisi Jürgen Matthes Almaniyanın təcili tədbirlər görməli olduğunu bildirir. O, ölkə daxilində islahatlarla yanaşı, haqsız rəqabətin təsirini azaltmaq üçün əlavə gömrük rüsumlarının tətbiqini təklif edir. Matthesin fikrincə, məqsəd bazarı rəqabətdən bağlamaq deyil, şirkətlər üçün bərabər rəqabət şəraiti yaratmaqdır.