Çin avtomobilləri üçün Avropa bazarında yeni məhdudiyyət

Avropa İttifaqı (Aİ) ticarət gərginliyini azaltmaq və yerli avtomobil sənayesini qorumaq məqsədilə hibrid avtomobil idxalına illik 350.000 ədəd kvota tətbiq etməyə hazırlaşır. Bloomberg-in məlumatına görə, tədbirin dekabrın 1-də qüvvəyə minməsi gözlənilir. İlk il 350.000 avtomobillə məhdudlaşdırılacaq kvotanın ikinci ildən etibarən illik 6% artırılması və 4 il müddətində tətbiqi planlaşdırılır. Ümumdünya Ticarət Təşkilatının prinsiplərinə uyğun olaraq, məhdudiyyət Aİ-yə bütün hibrid avtomobil idxalını əhatə edəcək. Aİ-nin ticarət komissarı Maroš Šefčovič Pekində Çinin ticarət naziri Wang Wentao ilə görüşərək ticarət kəsirinin azaldılmasını və Avropa sənayesinin qorunmasını müzakirə edib. Razılaşmaya əsasən, Çinin bəzi avtomobil hissələrinə tarifləri ləğv etməsi, ayaqqabı, dondurma və zeytun yağına tətbiq olunan tarifləri isə yarıya endirməsi nəzərdə tutulur. Tərəflər nadir torpaq elementlərinin tədarükü və ixrac nəzarətinin sadələşdirilməsi məsələlərini də müzakirə edəcəklər. Avqustda Çin istehsalı avtomobillər Avropadakı hibrid avtomobil satışlarının təxminən 25%-ni təşkil edib.