İqtisadiyyat üzrə Nobel mükafatı laureatı bu gün elan olunacaq

İqtisadiyyat üzrə Nobel xatirə mükafatının builki laureatı bu gün, oktyabrın 12-də İsveçin paytaxtı Stokholmda elan ediləcək.

Associated Press (AP) xəbər verir ki, mükafatın qalibi İsveç Kral Elmlər Akademiyası tərəfindən açıqlanacaq. Bu, 2026-cı il üzrə Nobel mükafatları mövsümünün sonuncu elanıdır.

Ötən il iqtisadiyyat üzrə Nobel xatirə mükafatına biznes innovasiyalarını araşdıran üç tədqiqatçı layiq görülüb. Onlar yeni məhsul və ixtiraların köhnə şirkətləri bazardan sıxışdırıb çıxarmaqla iqtisadi artıma və insanların rifahının yüksəlməsinə necə töhfə verdiyini izah ediblər.

İqtisadiyyat üzrə Nobel mükafatı rəsmi olaraq Alfred Nobelin xatirəsinə İsveç Bankı tərəfindən təsis edilmiş İqtisadi Elmlər üzrə Mükafat adlanır. Mükafat 1968-ci ildə İsveçin mərkəzi bankı tərəfindən, Alfred Nobelin xatirəsinə təsis edilib.

Qeyd edək ki, bu mükafat Alfred Nobelin vəsiyyətnaməsində nəzərdə tutulan ilkin Nobel mükafatları sırasına daxil deyil. Bununla belə, o, ənənəvi olaraq digər Nobel mükafatları ilə birlikdə, dekabrın 10-da Alfred Nobelin vəfat etdiyi gündə təqdim olunur.

Bu il tibb, fizika, kimya, ədəbiyyat və sülh sahələri üzrə Nobel mükafatlarının laureatları artıq açıqlanıb.

İqtisadiyyat üzrə mükafatın pul məbləği 12 milyon İsveç kronu, yəni təxminən 1,2 milyon ABŞ dollarıdır. Bu məbləğ bir laureata, bir neçə nəfərdən ibarət qrupa və ya müvafiq hallarda təşkilata verilə bilər.