Qızıl FED qərarı öncəsi ucuzlaşıb

Qızılın qiyməti çərşənbə axşamı Asiya bazarlarında 0,3% azalıb. Buna səbəb investorların ABŞ Federal Ehtiyat Sisteminin (FED) faiz qərarını və gələcək pul siyasəti ilə bağlı açıqlamalarını gözləməsidir.

Spot qızılın bir unsiyası 4126,84 dollara, dekabr ayı üçün qızıl fyuçerslərinin qiyməti isə 4146 dollara düşüb.

İnvestorların diqqəti 27–28 oktyabr tarixlərində keçiriləcək FED iclasına və inflyasiyanın vəziyyətini qiymətləndirmək üçün izlənilən şəxsi istehlak xərcləri (PCE) göstəricilərinə yönəlib. CME FedWatch məlumatlarına görə, bazar iştirakçıları FED-in növbəti iclasda faiz dərəcələrini dəyişməz saxlayacağı ehtimalını 83% qiymətləndirirlər. Dekabr ayında faiz artımı ehtimalı isə 94% olaraq göstərilir.

Yaponiya Bankının sədri Kazuo Ueda əsas inflyasiyanın 2% hədəfinə yaxınlaşdığını və faiz dərəcələrinin artırılması üçün imkanın olduğunu bildirib.

Faiz dərəcələrinin yüksək olması qızılın cəlbediciliyini azaldır. Çünki qızıl faiz gəliri gətirmədiyindən, yüksək faizli aktivlər investorlar üçün daha sərfəli ola bilər. Bununla yanaşı, Yəməndəki husilərin Səudiyyə Ərəbistanında enerji, hava limanı və hərbi obyektləri hədəf alması ilə bağlı iddialar geosiyasi riskləri gündəmdə saxlayır.

Digər qiymətli metallardan gümüşün qiyməti 0,7% azalaraq 56,69 dollara, palladiumun qiyməti isə 0,7% azalaraq 1112,08 dollara düşüb. Platin isə dəyişməyərək unsiyası üçün 1639,65 dollar səviyyəsində qalıb.