2026-ci ildə Azərbaycanın startap ekosistemi

2026-ci ilin “Global Startup Ecosystem” indeksinə əsasən, Azərbaycanda Şərqi Avropadakı bütün startapların 1%-ni təşkil edən 161 startap fəaliyyət göstərir. Bu, hər 100 000 nəfərə təxminən 2 startap düşməsi deməkdir. Azərbaycanın qlobal miqyasda ilk 1000-likdə yer alan 1 şəhəri var və bu göstərici dəyişməz qalıb. Ekosistem ötən il ərzində 7,3% böyüyüb; bu artım tempi isə həm qlobal orta göstəricidən (26,6%), həm də Şərqi Avropa üzrə orta göstəricidən (28,1%) aşağıdır. Ümumilikdə, Azərbaycanın startap ekosisteminin təxmini dəyəri 589,9 milyon ABŞ dolları təşkil edir.

"Global Startup Ecosystem Index 2026" reytinqində Azərbaycanın startap ekosistemi dünya üzrə 81-ci yeri tutaraq, əvvəlki illə müqayisədə 7 pillə geriləyib. Şərqi Avropa regionunda isə Azərbaycanın startap ekosistemi 2025-ci illə müqayisədə 2 pillə geriləyərək 20-ci yerdə qərarlaşıb; ölkə bu siyahıda Albaniyadan dərhal sonra, Moldovadan isə əvvəl gəlir. "StartupBlink" Ekosistem İndeksində Azərbaycanın bir şəhəri də yer alıb.

Şirkət qurmaq və onu genişləndirmək üçün yerli şəraitin nə dərəcədə əlverişli olduğunu ölçən "Innovators Business Environment Index" (İnnovatorlar üçün Biznes Mühiti İndeksi) göstəricisinə əsasən, ölkənin biznes mühiti dünya miqyasında 74-cü yerdədir.

Qeyd edək ki, Şərqi Avropa və Qərbi Asiyanın kəsişməsində yerləşən Azərbaycan neftdən asılılığı azaltmaq üçün iqtisadiyyatını transformasiya və rəqəmsallaşdırma ilə yanaşı, sahibkarları və startap təsisçilərini cəlb etmək üçün fəal şəkildə çalışır. Bu transformasiyanı dəstəkləmək üçün ölkə süni intellekt və digər inkişaf etməkdə olan texnologiyalarda innovasiya və artımı təşviq etməyə yönəlmiş təşəbbüslərə başlayıb. Bunlara akademik dairələr, sənaye və hökumət arasında əməkdaşlığı gücləndirmək üçün süni intellekt üzrə Tədqiqat Mərkəzinin yaradılması, eləcə də süni intellekt, blokçeyn və IoT kimi qabaqcıl sahələrə diqqət yetirən Microsoft və Huawei kimi qlobal texnologiya liderləri ilə AR-GE tərəfdaşlıqlarının qurulması daxildir.