Avropada elektrikli avtomobillərə tələbat artır
Fransa və Almaniyada elektrikli avtomobil satışlarının təxminən ikiqat artması nəticəsində tam elektrikli və şarj edilə bilən hibrid avtomobillər ümumi satışların 43%-ni təşkil edib.
Avropa Avtomobil İstehsalçıları Assosiasiyasının (ACEA) məlumatına görə, sentyabr ayında Avropada yeni avtomobillərin qeydiyyatı illik müqayisədə 10% artaraq 1,36 milyona çatıb. Beləliklə, satışlar ardıcıl 8-ci ayda da artım göstərib.
Fransa və Almaniyada elektrikli avtomobil satışlarının təxminən ikiqat artması nəticəsində tam elektrikli və şarj edilə bilən hibrid avtomobillər ümumi satışların 43%-ni təşkil edib. Ötən ilin eyni dövründə bu göstərici 32% olub.
Yaxın Şərqdəki münaqişə ilə əlaqədar yanacaq qiymətlərinin yüksəlməsi elektrikli avtomobillərə marağı artırır. Fransa və Almaniyada tətbiq olunan dövlət təşviqləri isə bu avtomobillərin yüksək qiymətini qismən kompensasiya edir.
Bloomberg Intelligence-in məlumatına görə, Çin avtomobil markalarının Avropada qeydiyyata alınan avtomobillərinin sayı bu il iki dəfədən çox artıb. Çin istehsalçılarının Avropa bazarındakı artımın əhəmiyyətli hissəsini təmin edəcəyi gözlənilir.
Sentyabr ayında Tesla tədarüklərini 73% artıraraq yüksəliş tendensiyasını davam etdirib. Çin istehsalçıları arasında isə ən böyük artım Chery şirkətində qeydə alınıb. Şirkətin satışları təxminən üçqat artıb, Avropa bazarındakı payı isə ikiqat yüksələrək 3,9%-ə çatıb.