Çin avtomobil bazarında şirkətlərin çoxu zərər edir

Çin avtomobil sənayesində istehsalçıların böyük hissəsi zərərlə işləyir. Chery International şirkətinin prezidenti Çjan Quibinqin açıqlamasına görə, Çin avtomobil istehsalçılarının təxminən 90%-i mənfəət əldə edə bilmir. O, artan avtomobil inkişafı xərclərinin bir çox şirkətin bazardan çıxmasına səbəb ola biləcəyini bildirib.

AlixPartners şirkətinin 2026-cı ilin iyununda yayımladığı Qlobal Avtomobil Görünüşü hesabatı da bu vəziyyəti təsdiqləyir. Hesabata əsasən, 2025-ci ildə yeni enerji avtomobilləri istehsal edən 30 Çin şirkətindən yalnız 3-ü ili mənfəətlə başa vurub. Qalan 27 şirkət isə zərər qeydə alıb.

Proqnozlara görə, həmin istehsalçılardan yalnız 7-si 2030-cu ilə qədər zərərdən çıxaraq mənfəət əldə edə biləcək. Digər zəif şirkətlərin bazarı tərk etməsi və ya daha böyük istehsalçılar tərəfindən satın alınması gözlənilir.

Çin avtomobil istehsalçıları satışları artırmaq üçün xarici bazarlara da üz tuturlar. Lakin beynəlxalq satışların genişlənməsi hələlik şirkətlərin gəlirliliyini təmin etmir.

Sektordakı əsas problemlərdən biri də istehsal gücünün tələbi üstələməsidir. Çin ötən il təxminən 35 milyon avtomobil istehsal etsə də, ölkənin illik istehsal gücü 55 milyon avtomobilə yaxındır. Nəticədə zavodların bir hissəsi tam gücü ilə fəaliyyət göstərmir. Artıq istehsal gücü, artan xərclər və qiymət rəqabəti şirkətlərin maliyyə vəziyyətinə təzyiq göstərir.