İstanbul İqtisadi Forumunda “Qeyri-müəyyənlik şəraitində pul siyasəti” paneli keçirilib

Türkiyə Mərkəzi Bankının təşkilatçılığı ilə İstanbul Maliyyə Mərkəzində davam edən İstanbul İqtisadi Forumunda “Qeyri-müəyyənlik şəraitində pul siyasəti” mövzusunda panel keçirilib. Panelin moderatoru Honkonq Valyuta İdarəsinin qubernatoru Eddi Yue olub. Müzakirədə fərqli pul siyasətlərinin, bazarlardakı qiymət uyğunsuzluqlarının və texnoloji risklərin pul siyasəti qərarlarına təsiri nəzərdən keçirilib.

Azərbaycan Mərkəzi Bankının sədri Taleh Kazımov bildirib ki, yüksək enerji qiymətləri cari hesab balansına və milli ehtiyatlara təsir edir, Mərkəzi Bank isə hazırda qiymət sabitliyinə daha çox diqqət yetirir. O, süni intellekt sahəsində sürətli inkişaf müşahidə olunduğunu, hökumətin qlobal tərəfdaşlarla hipermiqyaslı məlumat mərkəzlərinin idarə olunması ilə bağlı razılaşmaların son mərhələsində olduğunu deyib. Kazımov əlavə edib ki, Azərbaycan xaricdən gələn inflyasiyadan əhəmiyyətli dərəcədə təsirlənir: “Pul siyasəti baxımından əsas səyimiz sabit valyutamızı qorumaqdır. Valyutamız 2017-ci ilin dekabrından bəri sabit qalıb”.

Yunanıstan Bankının rəhbəri Yannis Stournaras geosiyasi gərginliklərə və enerji böhranına baxmayaraq, Avropa iqtisadiyyatının dayanıqlı qaldığını vurğulayıb. O, Yunanıstanın Avrozonanın orta göstəricisindən iki dəfə sürətli böyüdüyünü, uzunmüddətli inflyasiya gözləntilərinin isə təxminən 2 faiz olduğunu bildirib. Stournaras qeyri-müəyyənlik səbəbindən “şifahi rəhbərlikdən” çevik “çərçivə rəhbərliyi” modelinə keçildiyini, qərarların görüşdən görüşə verildiyini deyib.

Macarıstan Mərkəzi Bankının sədri Mihaly Varga enerji idxalından asılı olan ölkədə inflyasiyanın 2023-cü ilin yanvarında 24 faizə çatdığını, qətiyyətli addımlar nəticəsində sentyabrda 1,6 faizə endiyini bildirib. O, inflyasiya hədəfinin Avropa Mərkəzi Bankının standartlarına uyğunlaşdırılaraq 2,5 faizə endirildiyini və bunun 2028-ci il yanvarın 1-dən qüvvəyə minəcəyini açıqlayıb. Varga davamlı bazar dəstəyinin “mənəvi təhlükə” yarada biləcəyini xəbərdar edərək, zaman və miqyas baxımından məhdud müvəqqəti alətlərə üstünlük verilməsini tövsiyə edib. O əlavə edib ki, qeyri-müəyyənlik dövründə tək baza ssenarisinə etibar etmək olmaz, mərkəzi banklar alternativ ssenarilər hazırlayıb ictimaiyyətlə bölüşməlidir.

Eddi Yue isə mərkəzi bankların yalnız məlumatlara reaksiya verməklə kifayətlənməməli, şokların müvəqqəti, yoxsa daimi olduğunu əvvəlcədən ayırd edə bilməli olduğunu bildirib.